記得響幾年前，加密貨幣並唔係好似而家咁易買倒，好似Mxethshxp，一個比較早期可以買倒ETH嘅經營方法係，每日佢地都會響社交媒體公佈有幾多ETH可以買，然後你就要PM佢地講低要幾多、經佢地批准後響一定時間入數去指定戶口，最後就會射去你指定地址──一切講個信字之餘，當年仲要因為佢地成日被打壓需要頻繁轉換戶口，非常之有走鬼Feel。
但係去到今時今日，買賣Crypto經已方便好多，唔單止各個平台嘅UI非常直觀易用，而且有齊哂出金入金功能，仲要擺錢響度唔郁都有息收──因此我愈來愈多新加入買幣嘅朋友，直頭連個人嘅電子錢包嘅概念都無，只直接將幣安、Kikitrade、Crypto.com等平台當銀行戶口咁用，直接虛理哂相關嘅Crypto業務。
當買賣Crypto嘅方便程度愈來愈高，其實亦都代表住一般人入場嘅門檻愈來愈低，呢個對幣市黎講絕對係一個利好因素──我個人之所以睇好加密貨幣響中長線只升不跌，就係因為係Keep住有呢班潛在嘅散戶資金仲未流入市場。但另一方面，究竟今時今日仲有無需要獨立開一個電子錢包，亦開始成為一個值得討論嘅問題。
又想當年，當時呢啲網上交易平台被Hack、老闆穿櫃桶底走佬、出現經營困難被凍結資金嘅新聞無日無之，令早年買幣嘅人好難相信呢啲中心化平台嘅可靠性，因此就算響呢啲交易所買幣，我地第一時間都係將Crypto即時射入自己嘅私人錢包咁先安心，個原理就好似啲阿伯阿婆唔信銀行，只敢將錢攝響床下底一樣。
然而去到而家，幣安、Celsius之類嘅網上交易平台規模愈來愈大，甚至部份已去到「Too Big to fail」嘅地步，只要你限定幫襯最穩陣果堆平台，其實可信度已比以前高好多。而掉番轉，私人電子錢包亦都有保存密碼風險──我自己就曾經試過響幾年前買完一粒以太幣後跌壞咗個電話，而我仲未識得保存Seed Words，幾千蚊美金就咁無咗。就好似你擺響屋企嘅現金，比人偷咗就係偷咗，響交易平台你唔見咗密碼，反而仲有唔同後備方法可以幫你救番番黎。
客觀講，擺幣響交易平台定係自己電子錢包，個風險距離經已愈來愈近，然後都仲未計好多時響平台入面做交易，成本比你起響自己銀包比Gas仲平。
之但係去到最後，我仍然係推薦大家點都要自己開一個電子錢包，原因在於：
1. 開電子錢包都係一種學習過程，識多樣嘢永遠無壞；
2. 而家愈來多唔同花臣嘅Defi玩法，回報率始終比你響交易平台收息回報高，響你熟習咗基來嘅Crypto操作後，下一步都係要回歸電子錢包獲取最大利潤；
3. 以世界各國政府多番打擊加密貨幣交易，加上而家香港咁嘅時勢，而家要驚嘅唔再係交易平台爆煲／呃錢走佬嘅問題，而係政治問題。當然要入金買幣、賣弊出金，交易平台仍然係我地必不可少嘅資金出入口，但將狡兔三窟，始終係亂世中自保法則。
記住用下面條LINK申請KIKITRADE ACCOUNT